ငါ့လိပ်ပြာ ကငါ့ကို လှောင်နေတယ်

ငါ့လိပ်ပြာက ငါ့ကို လှောင်နေတယ်



မီးခြစ်ဗူးခွံတစ်လုံးကမှ
ယင်ကောင် တွေထည့်လှောင်လို့ရသေးတယ်
ခရုဆံကျွတ် အခွံလွတ်တွေများလှချည်ရဲ့
ခင်ဗျား အိပ်ကပ်ကို ကျနော်မဖြားယောင်းခဲ့ပါဘူး
မိတ်ဆွေ စီးနေတဲ့ မြင်းရိုင်းကို
သင့်တော်ရာသမိုင်းမှာ ချည်ထားခဲ့လိုက်ပါ
မီးကျိုး ၊ မောင်းပျက်
မီးပြတ် ၊ မောင်းကျိုး
ဘယ်ဂီယာထိုးပြီး ခရီးဆက်မလဲ
ငါ့ဘဝကို မောင်းနှင် နေတာ
အနုပညာ စွမ်းအင်တွေနဲ့ပဲ
ဒီလိုပြောတော့
ခင်ဗျားက ရယ်ချင် ရယ်မယ်
လွင်ပြင် ကျယ်ကျယ်မှာ အသံကုန် ဟစ်လိုက်
နောက်ဘဝမှာလည်း ဒီထက်မိုက်ခွင့်ပေးပါ
သိုးထိန်းခေါ်ရာ သိုးမည်းတွေ မလိုက်လိုကြဘူး


ညီမလေးရယ်
တစ်ကြောင်းချစ် ပန်းချီကားလေးပဲ ဖြစ်ပါရစေတော့

ငါ့လိပ်ပြာက
ပြုံးရုံလေးပဲ ပြုံးနေခဲ့တာပါ........။



မောင်ဖုန်းမြင့်

မစ္စတာ ဂျွန်နှင့် ညနေစာစားခြင်း

ချစ်သူငယ်ချင်း
အမျိုးကောင်းသားကြီး ဂျွန် ရေ......

အကောင်းစား စကော့ခ်ျ ဝီစကီ တစ်ခွက်ဟာ
သောက်သုံးသူ တစ်ဦးရဲ့ ယဉ်ကျေးမှု တန်ဘုိးကိုိ
ပိုမို မြင့်တက်စေသတဲ့လားကွာ
လာ...
ဖန်ခွက်နှုတ်ခမ်းချင်းတိုက်လိုက်
"မင်းရဲ့ ကျန်းမာရေးအတွက်"
"ငါ့ရဲ့ ကျန်းမာရေးအတွက်"
"လွန်ပြီးသော နှစ်ကာလ များ အတွက်"
ငါတို့ ဆုတောင်းလိုက်ကြရအောင်

ဖန်ခွက်ကို ဖြေးဖြေးပြန်ချ
ဂျွန်ပလေယာ ဆေးလိပ်ကို ဟန်ပါပါခဲ
အဆုတ်ထဲအထိ မီးခိုးငွေ့တွေ ပြည့်အောင်
ရှိုက်ဖွာလိုက်စမ်းပါဦး......"ဂျွန်"


မင်းလက်ထဲက အဝေးထိန်းခလုတ်ကို နှိပ်လိုက်
စက်ထဲက ဓါတ်ပြားချပ်ကို ပုံမှန်လည်ပါတ်ပါစေ "ဂျွန်"
ဟိုမှာ....တွေ့လား
ဧရာဝတီ ဒယ်လ်တာက ရေရှားပါးမှု ပြသနာတဲ့
ငါ့ရင်တွေ ပူလာလို့
ရှေ့က ရေသန့်ဗူးကို
ကျေးဇူးပြုပြီး ကမ်းလိုက်ပါဦး "ဂျွန်"

စာသင်ခန်းထဲ ရောက်ရမဲ့ အရွယ်မှာ
လ္ဘက်ရည်ဆိုင်ထဲ စားပွဲထိုးနေရတဲ့ ခလေးသူငယ်တွေဟာ
စီဗယ်လိုက်ဇေးရှင်းရဲ့လက်ပြန်ရိုက်ချက်တွေတဲ့လားကွာ
" ဒို့ဗမာ တွေ ဆင်းရဲ တာရှည်လွန်းသတဲ့ "
စပျစ်သီးလေး ကိုက်ဝါးရင်း
မချိမဆန့် ငြီးတွားပြ စမ်းပါ "ဂျွန်"

ကြားလိုက်သေးလား "ဂျွန်"
တောအုပ်ထဲ ပုန်းရှောင်နေရတဲ့ လူလေးသိန်း
လှေစီးပြေး ဒုက္ခသည်တွေတဲ့
တရားမဝင် ရွှေ့ပြောင်းလုပ်သားစာရင်း
ဒါတွေကို ခုချက်ခြင်း အလွတ်ကျက်ထားစမ်း "ဂျွန်"


အယဉ်ကျေးဆုံး ဧည့်လမ်းညွှန်တစ်ယောက်လို
အသားနီစပ်စပ် မျက်လုံးပြာပြာတွေကို
သေချာ ရှင်းပြလိုက်ပါ "ဂျွန်"
စာပေ ကျမ်းဂန်မှာလာတာ
ဒီလိုအသားအရေ ရှိတဲ့လူဟာ
ဝိဇ္ဇာဓိုရ် တစ်ပါးပါး ဖြစ်နိုင်တယ်တဲ့ "ဂျွန်"
သူတို့ရဲ့ တန်ခိုးနဲ့
မင်းရဲ့ဘဏ်စာရင်း ၂ ဆတိုးနိုင်ပါစေကွယ်


မာဒင်္ဂမှော်အောင်နေတဲ့
အမျိုးကောင်းသားကြီး မစ္စတာဂျွန် ရေ....
အံချီးမကုန်တဲ့ မင်းရဲ့ အတွေးတွေကို
ငါအကြိမ်ကြိမ် အလေးပြုပါရဲ့..

ရန်ကုန်မြိုသားတွေဟာ
အေသင် မြို့သားတွေလို ကျင့်ကြံသင့်သတဲ့

တောင်ဒဂုံက ဆိုက်ကားဆရာလေး
အုံနာကြေး မလောက်ငှနေချိန်မှာ
ဂျွန်က
"လရောက်အောက်မှာ လမ်းလျှောက်သူ"
သီချင်းလေးနဲ့ မျက်တောင်လေးမှေးလို့

ငါက
"ဂွကောင်တွေ ခွေးဖြစ့်ပေါ့လေး" ဆိုတဲတေးထပ်
အထပ်ထပ် ရွတ်ဖတ်နေချိန်မှာ
မင်းက " River is No Return" တေးလေးကို
စည်းချက်လေးလိုက်လို့

လူငယ်လေး တစ်ယောက်က
ဗန္ဓုလ ပန်းခြံထဲ လွတ်လပ်ရေးကျောက်တိုင် ကို မော့ကြည့်နေတုန်း
ဂျွန်က
လေဘာတီ ကျောက်ရုပ်ကိုမှ
အရောင်တင် ၊ ဆေးသုတ်ချင်ရှာသတဲ့လေ ...


မြန်မာပြည်ဘွား
အမျိုးကောင်းသားကြီး မစ္စတာ ဂျွန်ရေ
ဘိုဆန်ဆန်
နောက်ဆုံး ခွက်ကျန်လေး ရှင်းကြစို့
လာ....
ထပ်ဆုတောင်းလိုက်ကြရအောင်
"ဝံပုလွေတွေ ကျန်းမာပါစေကွယ်"




( ကျနော့်သူငယ်ချင်း နာမည် အပြည့်အစုံက မစ္စတာ ဂျွန်ဘတ္တလာပါ ၊ ဂုဏ်ပြုတဲ့ အနေနဲ့ သူ့ရှေ့နာမည် "ဂျွန်"ကို လေရူးသုန်သုန် ဝတ္ထုထဲက ဇတ်ကောင် ဘတ္တလာ နာမည်နဲ့ ပေါင်းစပ်ပေးထားတာပါ ။ )
်ိ့

အခုတ်အထစ်များတဲ့နေ့

"အခုတ်အထစ်များတဲ့နေ့"


ငါးသည်မ ငါးခုတ်သလို
လူအချင်းချင်း ခုတ်ကြ ထစ်ကြနဲ့
သွေးစက်တွေ ဖြန်းပက်နေကြပုံများ
တချို့က အားရတယ်
တချို့တွေက အားကျတယ်
သံဝေဂ တေးကို မဟစ်ကြွေးနိုင်သေးဘူး.... ။



ဆာမူရိုင်း တစ်ယောက်လိုဓါးချက်နဲ့
ကမ္ဘာမြေကြီးကို ခုတ်တယ်
ပန်းဆိုးတန်း လမ်းမပေါ်မှာခုတ်တယ်
ပါတ်စပို့ ရုံးရှေ့မှာ ခုတ်တယ်
မင်္ဂလာဒုံလေဆိပ်က ဒီပါချာ ခန်းမ မှာခုတ်တယ်
ဆူးလေ လမ်းမကို ခုတ်တယ်
ရှောင်ဇေ လီဇေ လမ်းမကြီးကို ခုတ်တယ်
"ပဲရစ် ၊ ဘန်ကောက် ၊ ဟောင်ကောင် ၊ တိုကျို " အစရှိတဲ့
စီးပွားပျက်ကပ်ဆိုက်နေတဲ့ မြို့ကြီးတွေကို ခုတ်တယ်
"မောင်ချောနွယ်" ရဲ့ လူကြိုက်နည်းတဲ့ ကောင်ကို ခုတ်ချလိုက်တယ်......။


ငါကိုယ်တိုင် ခုတ်လိုက်နိုင်တဲ့ နေ့တွေနဲ့
ငါကိုယ်တိုင် အခုတ်ခံလိုက်ရတဲ့နေ့တွေ ရှိတယ် ။


နွေဦးရဲ့ ရနံ့ကလဲ အရင်လို မပြင်းရှတော့ပါ
ဝဋ်နာ၊ ကံနာကျနေတဲ့ ဆောင်းနှောင်းအကြွင်းအကျန် နေ့ရက်များမှာ
ဗိုလ်အောင်ဒင်လို လွမ်းပြနေတဲ့ အလွမ်းည များစွာကိုလဲခုတ်တယ် ။


ယုဇနပင်ပျိုထက်က ဖဲကြိုးဝါဝါလေးတွေနဲ့
ငါ့ဥယျဉ် တောင်ဘက်ဖျားက အုံ့ဆိုင်းနေတဲ့
ပိတောက် ကိုင်းလေးကိုပါ ငါခုတ်ချလိုက်တော့တယ် ။


မောင်ဖုန်းမြင့်

အာရုံ ကျ တဲ့ကဗျာ

အာရုံ ကျ တဲ့ ကဗျာ



အာရုံ ကျ တဲ့ နေ့မှာ........
အာရုံ ထဲ လိမ့်လိမ့်ကျသွားတယ်....။
အာဂုံ ဆောင်စရာ မလိုပါဘူး
အာရုံ သိ စိတ်ထဲ မင်း ..နာမတော် ကို တီးတိုးရွတ်လို့.... ။
ငါတို့ ရဲ့ အာရုဏ် လာတဲ့အခါမှာ....
ဟောဒီ့...ဘဒ္ဒကမ္ဘာဟာ.....
ပြားပြား ဝပ်ရှာပေလိမ့်မယ်.......။

မောင်ဖုန်းမြင့်

ဘရူတပ်တို့၏ ဓါးချက်များ

( အမေရယ် … အမေ့ဆိပ်ကမ်းမကပ်တာ
ကြာပြီဖြစ်တဲ့သားသင်္ဘောလေ အမေရဲ့ .......
ကျနော် ရိုးသားခဲ့ပါတယ်....အမေ.....ဤသို့ပင် ပဲ့တင်ပါလိမ့်မယ်။ ။ ) ( မောင်ချောနွယ် )


ခေါင်းပေါ်က ခဏ ဖြတ်တဲ့ တိမ်တိုက် အတု ကို
ကောင်းကင် တစ်ခုလို့ ထင်နေမိတာ

ရေနစ်သူ ကောက်ရိုးပင်တွယ်သလို
အလွမ်းတွေကြား စုံးစုံးနစ်နေတဲ့ ငါ
အချစ် စစ်ကို တွယ်ချင်မိခဲ့......။

ဒါဟာလဲ ဒုလ္ဘဘ တစ်ရားတစ်ခုပဲ မဟုတ်လား...။


ရင်ခုန်သံ..အစုန် ၊ အဆန် နဲ့
လောကထဲ....
ကြောက်စရာကောင်းသလို ၊
တပ်မက်စရာကောင်းလိုက်ပုံများ....။

တခါ ၊တခါ မမြင်ရတဲ့ အနာက
ဒါဏ်ရာပိုပြင်းတယ် ........။


လူရိုး နဲ့ သူခိုးမလိုဘူး
လူဆိုး စစ်စစ်တွေပဲ လိုချင်တယ် ။........

ဘယ်သူသေသေကွာ .....
ကဗျာရေးတဲ့ ငတေ မာစေချင်သေးတယ် ......။

အို....အချင်း... ဘရူတပ်တို့
သင်တို့ ထိုးတဲ့ ဓါးသွားကို
တရှိုက်မက်မက်
ငါ....နမ်းရှိုက်ပါ၏........။

နောက်တစ်ကြိမ် အခွင့်ရခဲ့မည် ဆိုလျှင်
မျက်နှာချင်းဆိုင်မှ ဓါးချက်များကို
စောင့်ကြိုနေပါဦးမည် ..........။


မောင်ဖုန်းမြင့်

မေ့လျော့နေတဲ့ နေ့

နေ့ရက်များစွာထဲက

နေ့ဟောင်းတစ်ခုသာ ဖြစ်တယ် ......။

သေခြင်းနဲ့ရှင်ခြင်းကြားက
ခပ်ပါးပါးကြိုး မျှင်မျှင်လေးဟာ

တဖြည်းဖြည်း သာ ထူထပ်လာခဲ့ပေါ့
လူကိုယ်တိုင်ကတော့
အထူအပါး နားမလည်သေးဘူး .........။

အပြောင်းအလဲ လိုချင်ရင်
ဗလောင်းဗလဲသာ များများလုပ်

ဟုတ်ပြီလားကိုယ့်လူ.... ...။

ဒါနဲ့ပဲ ...
တက်ကျမ်း တစ်အုပ်ဖတ်တယ်
ပွဲစားတန်းသွားပြီး လေပတ်ကားရိုက်တယ်
လေချွန် ၊ လမ်းလျှောက် ၊ စီးကရက်သောက်တယ်
ခြေခင်းလက်ခင်းသာရင် ဘီယာဘားမှာထိုင်မယ်
လောကဓံ ရှစ်ပါးနဲ့ ထမင်းလက်ဆုံစားတယ်
အကောင်းစား ဂူချီ အိတ်ထဲမှာ
အမေမှာခဲ့တဲ့ စကားတွေ အကျအန ဖြန့်ချထားတယ်
ပြီးတော့ ဆံပင်ရှည်ရှည် ထားလိုက်တယ် .....။

ကြောင်တစ်ကောင်

အညောင်းဆန့်သလို
ပြီးခဲ့တဲ့ လမ်းတစ်လျှောက်ကို
ကျောဆန့်ကာပြန်အကြည့်...
အလို.......
ချစ်ခြင်းတွေအထပ်ထပ်နဲ့
လူ့သက်တမ်း ထက်ဝက်ခြမ်းမှာ
ရန်သူ မှတ်တမ်း

နှစ်ထပ်ကွမ်း ကျော်ကျော် မြတ်တယ်...

ဖုန်းမြင့်


(မတ်လ ၆ ရက်နေ့က ကျရောက်တဲ့ မွေးနေ့အထိမ်းအမှတ် ကဗျာလေးပါ .... ဘာနေ့တွေ ၊ ညာနေ့တွေ
ဘာအမှတ်တရတွေ ၊ ညာ အမှတ်တရ တွေ မလုပ်ချင်တာနဲ့ပဲ ခုမှ တင်ဖြစ်တာပါ ...။ )

တစ်ချို့ အကြောင်းအရာတွေက ကျွန်တော် ကိုယ်တိုင်သေချာ မသိဘူး

ပုထုဇဉ်နော ဥမ္မတ္တကောလို့ ဆိုရိုးစကား ရှိခဲ့လေသည် ...........။


လူ ၊ သတ္တာဝါ ပုထုဇဉ်တွေ မှန်သမျှ တနည်းမဟုတ် ၊ တနည်း ကိုယ်ယုံကြည် ထင်မြင်သည့် အယူအဆ ကို ဖက်တွယ် ကိုင်စွဲကာ ရူးသွပ်ခဲ့ကြဘူးပါလိမ့်မည် ။ ထိုနည်းတူစွာ ကျနော်လဲ အပြင်းအထန်ဆုံး ရူးသွပ်ခဲ့ဘူးလေ သည် .....။

အောက်ဖော်ပြပါ စာစု အချို့သည် အရူးတစ်ယောက်ရဲ့ အိပ့်မက် (သို့)ဥမ္မတ္တက တစ်ဦး၏ မှတ်တမ်းဟု အဓိပ္ပါယ် ဖွင့် ဆိုနိုင်ပါသည် ............။



(၁ ) ။ ။


တစ်ချို့အကြောင်းအရာတွေက ကျွန်တော် ကိုယ်တိုင် သေချာမသိဘူး ......

ကမ္ဘာမြေက နာဖျားနေတာ ကြာပြီဖြစ်သည်။

.. ``ကျနော် စစ်မတိုက် ချင်ဘုး မေမေ`` ... ပါလက်စတိုင်းခလေးငယ် တစ်ယောက်က သူ့အ မေရင်ခွင်မှာလဲလျောင်းနေလျက်က မိခင်မျက်နာကို မော့ကြည့်ရင်း ပြောလိုက်သည် ...။ `` အေးပါသားရယ် သားကြီးလာတဲ့ အချိန် ရောက်ရင် စစ်ပွဲတွေ ရှိတော့မှာမဟုတ်ပါဘူး`` `` ခု မေမေ တို့ ညစာအတွက် တစ်ခုခု ရှာလိုက်ဦးမယ်`` ဟု ပြောရင်း ခြေတု စွပ်ကာ ချိုင်းထောက်ကို အမှီ သဟဲပြုရင်း အမှောင်ထဲ တိုးဝင် ပျောက်ကွယ် သွားလေသည် ..........။

တစ်ချို့ အကြောင်းအရာတွေက ကျွန်တော်ကိုယ်တိုင် သေချာမသိဘူး ........။

(၂) ။ ။

``ဗားတော့ဘရက်`` က အကုန်လုံးလွတ်ရင်လွတ် အကုန်လုံးငတ်ရင်ငတ်တဲ့ ကဗျာတစ်ပိုဒ်ရေးခဲ့တယ် ကျနော်တို့ အကုန်လုံးလွတ်နိုင်ပါ့မလား( မသေချာပါ) အကုန်လုံးငတ်မှာလား (၈၀% လောက်သေချာတယ်) ၂၀ % ထဲမှာသင် ပါဝင်မည်မဟုတ်ပါ ...။
အထက်ပါ အဖြေများသည် ကမ္ဘာကျော် မိုက်ကရိုဆော့မှ ထုတ်လုပ်လိုက်သော မြန်နှုန်းမြင့် ဆော့ဝဲလ် တစ်ခု မှ ဖြေကြားခြင်းဖြစ်ပါသည် ။ ( ထို..ကွန်ပျုတာအား မဆိုင်းမတွပင် ချက်ခြင်းရိုက်ခွဲလိုက်ပါသည် ..၎င်းသည် တိကျသော အဖြေ ထုတ်ပေးနိုင်ခြင်းမရှိပါ )



(၃)။ ။

တစ်ချို့ အကြောင်းအရာတွေက ကျွန်တော် သေချာမသိသေးဘူး .......။

အမေရိကန်နိုင်ငံ ၌ အိုဘားမား သမ္မတ အဖြစ်ရွေးကောက်တင်မြှောက် ခြင်းခံရလေသည် ။သူသည် အမေရိကန်နိုင်ငံ ၏ ပထမ ဦးဆုံး လူမည်းသမ္မတ ဖြစ်လေသည် ။ အမေရိကန် သမ္မတ ရွေးကောက်ပွဲနှင့် ကမ္ဘာမြေကြီး၏ ခုခံ စွမ်းအားသည် တိုက်ရိုက် အချိုးကျပါသလား။
ကမ္ဘာကြီးသည် တဖြေးဖြေးပိုမို မှောင်မဲ လို့လာနေပါသည် ။ မြန်မာ လူငယ် ဟစ်ဟော့ သီဆိုသူများကတော့ " ဘာလုပ်ကြမှာလဲ " ဟု မေးခွန်းတစ်ခုကို သီချင်းလုပ်ဆိုနေကြပါသည် ။ မဆိုးဘူး ဒီသီချင်းက နားထောင်လို့ ကောင်းတယ် .... တစ်ယောက်ထဲ တိတ်တိတ်လေး မှတ်ချက် ချမိသည် ။ ( အသံတွေ သိပ်မထွက်ချင်တော့ပါ )


(၄) ။ ။

တစ်ချို့ အကြောင်းအရာတွေက ကျွန်တော် ကိုယ်တိုင်သေချာ မသိသေးဘူး.........။

ဆောင်းညတွေက ပိုမို အရိုင်းဆန်လာနေကြသည် ၊ အရင်တုန်းက ဆိုရင်တော့ ဆောင်းညများစွာက အဝတ်တွေ အထပ်ထပ်ရစ်ပတ် လို့ ကျပ်စည်းထားတဲ့ မံမီရုပ်အလောင်းလို ဖြစ်နေသည် ။ ဆောင်းရဲ့အထိအတွေ့က နူးနူးညံညံ အိအိ စက်စက်လေးဖြစ်သည် ဂီတစာဆို တစ်ဦးက ဆောင်းကတ္တီပါလို့တောင် အမည်ပေးခဲ့သည် ...ဘယ်လောက်ချစ်စရာကောင်းလိုက်တဲ့ နာမည်လေးလဲ ..ခုများတော့ ဆောင်းညတွေကလဲ မီးတောက် တစ်ခုလို အရိုင်းဆန်နေခဲ့ပေပြီ..... ဝတ်လစ်စလစ် ဆောင်းညများလို့ သာ အမည်ပြောင်းပေးလိုက် ချင်တော့ သည် ။ ဟုတ်တယ် .. အမေဇုံတောထဲက လူရိုင်းတွေလို မီးဖိုတစ်ခု လုပ်ပြီးတော့ ကကြတာပေါ့.....။ တစ်ခါ တစ်ခါ စိတ်လွတ်လက်လွတ် ကခုန်ပစ်လိုက်ခြင်းသည် စိတ်ဖိစီးမှုများကို အတန်ငယ် လျှော့ပါးစေပါသည်။ ( အမည်မသိ ပညာရှိတစ်ဦး )။
အထက်တန်းကျေင်းသား ဘဝကတော့ သူငယ်ချင်း၂ ယောက်နှင့်အတူ အိမ်အပေါ်ထပ် ထပ်ခိုးလေးပေါ်တွင် အကြောင်းမဲ့ သီချင်းများ ကျယ်လောင်စွာဖွင့်ပြီး အတန်ကြာအောင် ခုန်ပေါက် ကခုန်ဘူးခဲ့သည် ...။ နောက်တော့လဲ ခြေကုန်လက်ပန်းကျပြီး အိပ်ပျော်သွားခဲ့၏ ။
ပြန်နိူးလာတော့ လန်းလန်း ဆန်းဆန်း ဖြစ်နေခဲ့သည် ..။ ယခု အခြေအနေမှာလဲ ဒီလိုပဲ ခုန်ပေါက် ကလိုက်ရရင် ကောင်းမယ် ဟု တွေးမိခဲ့သည် ...။ ဟင့်အင်း မဖြစ်သေးဘူး တော်ကြာ အရူး ဆိုပြီး ဖမ်းသွားမှ ဟုတ်ပေ့ ဖြစ်နေမယ် ...။ (အရူးသည် ..အရူး ဟု စွတ်စွဲကာ ဖမ်းဆီးထိမ်းသိမ်းခံရမည် ကိုတော့ ကြောက်ရွံသေးသည် )





(၅) ။ ။

တစ်ချို့ အကြောင်းအရာတွေက ကျွန်တော် ကိုယ်တိုင်သေချာမသိဘူး............

ကယ်လိုရီတွေ များများရဘို့ ဘာတွေစားသုံး သင့်လဲ ကျနော်သေချာမသိပါ.. ၊ ရပ်ကွက်ထဲက ဆရာဝန် ပေါက်စလေးရဲ့ ဆေးခန်း သွားပြတော့ ရုပ်ပုံကားချပ်တွေဖြင့် သရုပ်ဖော်ထားသော အာဟာရ ဖြည့်စွက်စာများဆိုသည့် ကားချပ် တစ်ခုကိုတော့ ငေးမော ကြည့်ဘူးပါသည် ..။ ပုံတွေက အရောင် အသွေးစုံစုံ နှင့် လှပနေတာကြောင့်လဲ ဖြစ်ပါလိမ့်မည်...။ ကားချပ်ထဲက ကြက်ကောင်လုံးကြီးကတော့ ကြည့်လိုကောင်းတာ အမှန်ပဲဖြစ်သည် ... ။သို့သော် လမ်းထိပ် ကိုပြန်ရောက်တော့ လဘက်ရည်ဆိုင်မှ စားပွဲထိုး သူငယ်လေးက စမူဆာ ၂ ခုနဲ့ ထမင်းတစ်ဇလုံကို မြိန်ရေ ယှက်ရေ နယ်ဖတ်စားသောက်နေတာ တွေ့လိုက်ရလေသည် ..( အမှန် ဆို သူ့အရွယ်လေး နှင့် စာသင်ခန်းထဲမှာပဲ ရှိနေရမှာဖြစ်သည် ။ ) သူ့အနားကို အသာကပ်ကာ စကားစမည် ပြောကြည့်လိုက်သည် ..... `` ဘယ်လိုလဲကွ `` ``စားလို့ကောင်းရဲ့လား `` ဆိုတော့ `` ကောင်းတယ် လို့လဲ မဟုတ်ပါဘူးဗျ `` ``ဒီလိုပဲ သားတို့ကတော့ ကော်စားလိုက်တာပဲလို့ `` ခေတ်ဆွေး ကြော်ငြာ တစ်ခုကဲ့သို့ဖြေလေသည်... ။ ``ဒါဆို မင်းအဟာရ ဖြစ်အောင် ဘယ်လိုစားရမလဲ ဆိုတာ သိလား `` ဆိုတော့
``ဟုတ်ကဲ့ `` ``မနက်တိုင်း ထမင်းရည် သောက်မှာပေါ့ဗျ`` ဟု မခိုးမခန့် ဖြေလေသည်။

ထိုညက ကျနော် တစ်ယောက်ထဲ ချိုင်းနားတောင်းသွားကာ ဝါးစိမ်း အရက်တစ်အိုး မှာ ယူကာ မူးအောင် သောက်လိုက်မိ တော့သည် ....။ ရုတ်တရက် မှန်ပြန်ကြည့်လိုက်တော့ ကျနော်ကိုယ်တိုင်က စားပွဲထိုးလေး ဖြစ်နေသည်ကို တွေ့ရှိလိုက်ရသည် .....။

သို့သော် ပါးဖောင်းဖောင်းနဲ့ စားပွဲ ထိုးကလေးဖြစ်နေပါသည်။ ..မပီဝိုးတဝါး မှတ်ချက်ချ လိုက်မိသည်မှာ ..ဒီကောင် တော်တော် လူပါးဝတယ် .......ဟု ရေရွတ်မြည်တမ်းမိလေသည် ...။

ရွှေတံဆိပ်ရ ကစားသမား (သို့) ကဗျာ ဆရာ

ဒီပုံကဒီက

ရွှေတံဆိပ်ရ ကစားသမား (သို့) ကဗျာ ဆရာ

သူဟာ.......
ကိုယ့်ဂိုး ကိုယ်သွင်းမိသူ
မြို့တစ်မြို့ကို သိမ်းပိုက်နိုင်လိုက်တဲ့
စစ်သူကြီး
ရင်ခုန်သံမြှင့်တင်ရေးသမား
ပိုလီယို ခြေထောက်တစ်စုံနဲ့
ကောင်းကင်ကြိုးကစားသူ
ဆောင်းအိပ်မက်တွေ
ပျိုးကြဲစိုက်တဲ့ ယာသမား
ဖျံတွေကို သင်ကြားတဲ့
ဆပ်ကပ် ဆရာ
သံသရာ ကို
နေ့ပြန်တိုး ပေးစားနေတဲ့သူဌေး
လောကကို ပခုံးနဲ့ ထမ်းတင်တဲ့
ဝန်တင်သမား
ရင်ဘတ် အပွန်းခံပြီး
မိကျောင်းတက် တက် ကာ
ပစ်မှတ်ကို သေနတ်နဲ့ ချိန်တယ်
သူ့ပြောင်းဝက ဖျာကနဲ ပန်းတွေပွင့်ခဲ့ပေါ့



ဘဝအိုလံပစ်မှာ
စံချိန်တင်ဒါဏ်ရာတွေနဲ့
ရွှေတံဆိပ်များစွာ
ဆွတ်ခူးနိုင်ခဲ့သူ ဖြစ်ခဲ့တယ် .................။





မောင်ဖုန်းမြင့်

ဧကစာ သီဟ

(ဒီကပုံပါ)

တစ်ကောင်ထဲ

ဒါပေမဲခြင်္သေ့ မဟုတ်ဘူး
တော၃ထောင် လွှမ်းအောင်

မဟိန်းနိုင်ဘူး

တီးတိုးတီးတိုး

သဖန်းပိုးပြောတယ်

ဥပဓိရုပ်ခန့်လဲ

အလုပ်ကမဖြစ်ဘူး

ဦးခေါင်းတစ်လုံးထဲရှိတာတောင်

ခန္ဓာကိုယ်က

လက်ဝဲ ၊ လက်ယာ ကွဲသေးတယ်

ခလေးတွေ အမြဲ စနေကြ

မနုသီဟ ဖင်နှစ်ခွတဲ့

(လူမလေး ၊ ခွေးမခန့် ဘဝ )

စောင်းတန်းရှေ့မှာ

ငုတ်တုပ် ထိုင်နေတုန်းပဲ ...............။

ဖုန်းမြင့်