နံရံတွေက အေးစက်နေတာပဲ
ငါ့မျှော်လင့်ချက်ကဘာလဲ
အေးစက်စက် နံရံတွေပေါ် ငါ့လက်ဖ၀ါးနဲ့ ပွတ်သပ်ကြည့်မိ
မနက်ဖြန်ငါ ဘာဖြစ်လာမလဲ
င့ါကိုချစ်တယ်ဆိုတဲ့ မိန်းမ
ငါကချစ်ရတယ်ဆိုတဲ့ မိန်းမ
သူတို့နာမည်တွေ နံရံတွေအပေါ်မှာရှိနေတာလား
ငါ့ငယ်ဘ၀ အိပ်မက်ဟာ စမ်းတ၀ါးဝါး
ငါနံရံတွေအပေါ် ကို ထပ်စမ်းသပ်ကြည့်မိ
ငါ့အကြောင်းဟာ
ငါရေးထိုးထားမိသမျှဟာ
ငါနဲ့ငါမိသားစုဟာ
ငါနဲ့ ငါ့ယုံကြည်ချက်တွေဟာ
ငါနဲ့ ငါ့သူငယ်ချင်းတွေဟာ
ငါနဲ့ငါ့မိတ်ဆွေတွေဟာ
ငါနဲ့ငါ့လူအဖွဲ့အစည်းဟာ
ငါတို့ကို အုပ်ချုပ်နေသူများ
ငါတို့ရဲ့ ကဗျာ ဆရာများ
ငါတို့ရဲ့အနုပညာရှင်များ
ငါတို့ရဲ့ပေါ့ပ်စတား ၊ ရော့စတားများ
ငါ့ခွက်ကို ငါ လှမ်းယူလိုက်တယ်
နံရံတွေအပေါ်က အတွေ့အထိဟာ အေးစက်စက်
ငါ့နဖူးကို ငါပြန်စမ်းမိ
ငါ့အတွေ့ အကြုံကို ငါပြန်စမ်းမိ
ငါ့လူ့ဘ၀ကို ငါပြန်စမ်းမိ
နံရံတွေက အေးစက်နေတာပဲ
ငါ့ဘ၀ဆိုတာ အေးစက်တဲ့ နံရံတွေကြားမှ ညှပ်လို့ . . . . ။
မောင်ဖုန်းမြင့်
ဇန်နဝါရီ၊ ၂၀၁၁၊
No comments:
Post a Comment